Mungia, Uribe delakoaren barruan egon da. Eskualde honek Bizkaiko Batzarretarako hauteskunde-barrutia mugatzen du eta kostaldetik Txorierrira doa, Mungialdea ere barne duelarik. Turismo arloan eta horrelakoetan Uribe mailan koordinatzen dira hemengo udalerriak.

Denbora pasatu ahala, Mungialdea deitu izan den gune mugatuagoa eratzen joan da (Bizkaiko Foru Aldundiaren Lurralde-Plana). Tradiziozko eskualde honek honako udalerriak hartzen ditu bere barnean: Arrieta, Bakio, Fruiz, Gamiz-Fika, Gatika, Laukiz, Maruri, Mungia, Meñaka. Dena dela, euren arteko koordinazio eta lankidetza moduak oso bariatuak dira, euren tamainagatik, besterik ez bada ere. Tradizio handienetarikoa, udalik gehienak barne dauden Gizarte Zerbitzuetako Mungialde Partzuergoa da, baita Gurutze Gorriaren anbulantzi-zerbitzua ere.

Hori horrela dela ere, Mungiak Mungialderako zerbitzu asko ditu bertan, bigarren hezkuntzako ikastetxeak, lanbide hastapenetarako zentruak, Behargintza eta enplegurako zerbitzuak, besteak beste.