Abenduaren 24an

Euskal Herriko ospakizunik nagusienetako bat Olentzeroren Etorrera dugu, eta Mungian balio berezia dauka, izan ere, Olentzeroren Etxea Mungian berton dago. Ospakizun horrek Gabonen hasiera markatzen du, baina bere jatorria neguko solstizioarekin eta suaren inguruko erritoekin dago lotuta. Iluntzean, 17:00ak aldera, herritarrez osatutako talde handi batek zabaltzen dio bidea Olentzerori bere etxetik herriko plazaraino. Segizio horretan, adin guztietako herritarrak batzen dira, umeak, gazteak, helduak eta edadekoak.